18 сакавіка ў віцебскай абласной філармоніі адбыўся канцэрт гурта «Стары Ольса». Канцэрт прайшоў з вялікім аншлагам. У зале сабралася ў асноўным моладзь, і відавочна было, што прыйшлі хлопцы і дзяўчаты на канцэрт старажытнай беларускай музыкі не выпадкова, што яны шануюць сваю гісторыю і добра ведаюць творчасць «Старога Ольсы». А калі музыкі зайгралі адзін са старажытных танцаў, які быў забаронены каталіцкай царквой як «паганскі», з глядзельнай залы выйшлі дзяўчаты і пачалі танчыць. Як адзначыў кіраўнік «Старога Ольсы» Зьміцер Сасноўскі, яны рабілі гэта так, як і нашыя далёкія продкі. Пад канец канцэрту моладзь разгарнула у зале бел-чырвона-белы сцяг.
«Стары Ольса» – гурт сярэднявечнай беларускай музыкі, існуе ён з 1999 г. Назва гурта паходзіць ад невялічкай рачулкі Ольса, што на Заходняй Магілёўшчыне. У рэпертуары «Старога Ольсы» – беларускія народныя балады і ваярскія песні, беларускія народныя танцы, творы беларускіх кампазітараў эпохі Рэнесанса, кампазіцыі з беларускіх зборнікаў прыдворнай музыкі («Полацкі сшытак», «Віленскі сшытак»), беларускія канты 16 – пачатку 17 стагоддзяў, а таксама еўрапейскія папулярныя мелодыі эпохі сярэднявечча і Рэнесанса. Гурт супрацоўнічае з многімі рыцаскімі клубамі Беларусі і Еўропы, з музеямі і даследчыцкімі цэнтрамі, з майстрамі старадаўніх інструментаў, з гуртамі народнай, прыдворнай, духоўнай і гарадской старадаўняй музыкі, з асобнымі выканаўцамі на старых інструментах. Музыка гурта дазваляе аднавіць гучанне многіх забытых інструментаў. Тое, на чым граюць музыкі, гэта максімальна дакладныя па выгляду, тэхналогіі і сыравіне копіі старажытных беларускіх інструментаў – дуды (валынкі), ліры, гусляў, свірэлі, варгана, акарыны, сурмы, берасцяной трубы, гудка, барабана. Такім чынам «Стары Ольса» намагаецца дасягнуць найбольш поўнай рэканструкцыі музычных традыцый Вялікага княства Літоўскага, асноўнай культурнай і геапалітычнай часткай якога ў 13-18 стагоддзях была Беларусь. Дарэчы, у Вялікім княстве Літоўскім быў створаны ўнікальны сінтэз беларускай народнай і прыдворнай музыкі з еўрапейскімі музычнымі дасягненнямі.
Акрамя ўласных тэатралізаваных канцэртаў, гурт выступае на фестывалях сярэднявечнай культуры, рыцарскіх турнірах і фальклорных фестывалях. «Стары Ольса» выдаў ужо каля дзесятка паўнафарматных дыскаў. Найбольшую цікавасць у слухачоў вызываюць «Сярэднявечная дыскатэка» і «Гераічны эпас». Першае – гэта зборнік старажытных беларускіх і эўрапейскіх танцавальных мелодый, а другое – сапраўднае музычнае даследванне, куды увайшлі ўрачыстыя творы, вайсковыя песні, народныя баляды, аб'яднаныя гераічнай тэматыкай. На жаль, падчас канцэрту у Віцебску у гледачоў не было магчымасці набыць дыскі групы «Стары Ольса» - музыкі на іх проста забыліся.
Аліса МІЕЛАФОН